بقلم : محمود الشهابي
غالباً ما كنا نشعر بالملل أثناء المحاضرات العسكرية
المقرره علينا عندما يستفيض قدامى العسكريين
وفي أحدى المحاضرات دخل أحد القادة إلى القاعة
وقدم نفسه قائلاً اللواء حسام حاجة ثم ظل صامتاً برهة
والحقيقة مع مرور الوقت نسيت قال إسمه حسام إيه
لكن ما أتذكره أنه بدأ الحديث بصرامة شديدة
إنتقد فينا كل مافينا من قصور في الانضباط
حتى بدأت الهممه تعلو للتعبير عن الامتعاض
فقررت أن أنتقل بالحديث إلى منطقة أخرى ..
حاولت جذب سيادة اللواء حسام حاجة
إلى منطقة الذكريات لإستهلاك الوقت وتخفيف الأجواء
فسألته بنبرة فيها شيء من الجديه :
يا فندم لو أثناء حرب أكتوبر كنت سمعت
الحجر بينطق وبيقول لك :
يا مسلم هناك يهودي خلفي ..
تعالى فاقتله كنت هتروح تقتله فعلاً؟
ولا كنت هاتستغرب إن الحجر بينطق !
إبتسم اللواء حسام حاجة ثم أجاب بهدوء قائلاً :
يا ابني في الحرب مش هاتسأل ليه و ازاي ..
ولا هاتعتبر إن الحجر ينطق دي معجزة
ولا هاتستغرب الحجر عرف إزاي إنك مسلم
في الحرب ومع كل اللي بيحصل فيها
مافيش وقت تفكر أصلاً في حاجة ..
إنت بتسلم أمرك كله لله ومادمت مع الله
فكل مايحدث حولك يعقل أمام قدرة الله .
صمت اللواء حسام حاجة قليلًا
ثم أردف بصوت خافت قائلاً :
طب أنا هأسألك سؤال ..
هما الناس اللي إستشهدوا في حرب أكتوبر أثناء المعركة
عرفوا إننا إنتصرنا والا لغاية دلوقت مايعرفوش ؟
إحترت قليلاً أمام سؤال اللواء حسام حاجة ده ..
وندمت إلى حد ما على ما وضعت نفسي فيه من مأزق
إلى أن إستلهمت فكرة أنهم أحياء عند ربهم يرزقون
فأجبت بأنهم أكيد عرفوا النصر قبلكم إنتوا أصلاً.
إنتفض اللواء حسام حاجة من مقعده لمصافحتي قائلاً :
برافو عليك .. هما فعلاً كانوا عارفين قبلنا كلنا
بدليل إن مافيش واحد منهم إتصاب في ظهره
كل شهدائنا إصابتهم في صدورهم مقبلين غير مدبرين
عشان كده النصر ده تحقق بسبب إقبالهم على الجنة .
لاحظت إنفعال اللواء حسام حاجة ..
وقلقت الحقيقة إنه يستشهد وإحنا بنتكلم
فحاولت التخفيف قائلاً :
إيه الأغاني اللي كانت بتحفزكم في الجبهة يافندم ؟
تعجب من السؤال ثم أجاب قائلاً :
أغنية الربابة بتاعة وردة كانت بتضايقنا جداً .
كانت بتحسسنا إن الشعب مش حاسس بينا
والا حاسين باللي إحنا فيه ..
كنا إحنا بنسمع صفير الطيران والدانات
والناس قاعدة بتغني على الربابة
الأغاني دي صحيح بقت جميلة بعد الحرب
لكن أثناء الحرب كانت بتضايقنا أكثر من إنها تشجعنا
إنتهت المحاضرة
وإنصرف اللواء حسام حاجة بعد أن تعلمنا منه حاجة
أننا في كل عام في ذكرى إنتصار السادس من أكتوبر
نرفع الأعلام ونسمع الأناشيد ونقرأ الفاتحة لكل شهيد
